In martyris Laurentii non incruento proelio,
Armata pugnavit fides proprii cruoris prodiga.
Hic primum e septem viris qui stant ad aram proximi,
Levita sublimis gradu, et ceteris praestantior.
Hic dimicans fortissimus non ense praecinxit latus,
Hostile sed ferrum retro torquens in auctorem tulit.
Sic sancte Laurenti, tuam nos passionem quaerimus;
Quod quisque supplex postulat, fert impetratum prospere.
Dum cael'inenarabili allectus urbi municeps,
Aetern'in arce curiae gestas coronam civicam.
Honor Patri cum Filio, et Spiritu paraclito,
Qui nos tuis suffragiis ditent perenni laurea.
